Brazil Vô địch Copa America Bao Nhiêu Lần - Bong Da Truc Tuyen

Pakete sa gituohang shabu, nakumpiska sa DPRC

Details Published: Tuesday, 27 January 2026 11:15 Written by DavNor PICKMO Views: 22

Nakitaan og gituohang ilegal nga droga si Angel Lovely alyas “Lablab,” 38 anyos, residente sa Purok Maligaya, Tagum City, atol sa gilusad nga screening sulod sa Davao del Norte Provincial Rehabilitation Center kagahapong adlawa, Enero 26.

Sa maong inspeksyon, nakumpiska sa mga awtoridad ang usa ka pakete sa gituohang shabu nga nakuha sa bulsa sa pantalon sa suspek.

Nahibaloan nga si Lablab gi-remand gikan sa Talaingod Municipal Police Station padulong sa Provincial Jail tungod sa kaso nga Republic Act 9165 o ang Comprehensive Dangerous Drugs Act of 2002.

Sumala ni Provincial Warden Juaren Matulac, tungod sa nahitabo, posible pang pasakaan og dugang nga kaso ang suspek ilawom gihapon sa Republic Act 9165, nga mahimong makadugang sa iyang sentensya.

"So, during sa iyang pag adto diri, nag conduct ang atong mga personel sa TPRC sa Davao del Norte Rehablitation Center, ‘nya during sa iyang body phase, narecover sa iyaha ang gihinalaang shabu nga more or less naa sa 00.1 nga grams. Sa pag recover sa iyaha sa maong illegal drugs, nagpatawag dayun mi og investigator ug nagpatawag pud mi og Brgy. Kagawad, elected officials dinhi sa Barangay Mankilam diin asa nasakop ang atoang Provincial Jail. Tungod sa narecoveran nasab sya og gihinalaang shabu pasakaan napud sya pag usab og another nga kaso. Republic Act 9165 gihapon. Well, additional ni sa iyang kaso pud. Ang proper disposition niini, (anaa) sa atong kapulisan sa Tagum City,” matud ni Matulac

Ingun pa ni Lablab, wala gyud siya kabalo nga adunay pakete sa droga sa iyang bulsa. Kini iyang gisuot sa dihang siya gidakop pipila ka adlaw ang milabay sa wala pa siya madala ug maremand sa Provincial Jail, ug natingala kuno siya nga sa dihang gi-inspeksyon kini, dunay nakit-ang iligal nga droga.

“Nalipay naman unta ko ma’am ba nga na remand ko diri karon pero wala ko nag expect nganong naay (pakete) sa akong secret pocket, imbis nalipay nako nga makagawas nako kay akong mga anak sige nag hilak, gagmay pa baya ko’g anak. Wala man jud koy kuan ani ba, bag-ohan pa gud ko nisulod ani, tungod rapud sa kawad-on namo, kay akong papa kapila na gi-atake, walay padala ang akong ate, unya single mom pud ko, wala pud suporta ang papa sa akong mga anak. Dili man jud nako ni kuan, nagkakuan nalang jud ang panahon karon ba," sulti ni Lablab

Aron masuta pag-ayo ang tibuok detalye sa panghitabo, gi-review usab sa mga awtoridad ang CCTV footage sulod sa pasilidad.

Sa laing bahin, nagpaabot og panawagan ang suspek sa iyang pamilya, ilabi na sa iyang amahan, nga matud niya, nasuko na saiya, ug nangayo siya og higayon nga masabtan ang iyang kahimtangan.

“Pa, kabalo ko nga suko kaayo ka sa akoa sa pagkahitabo pero wa man nako ni gipangandoy nganong nga maingon-ani ko pa ba. Naa koy rason nganong gisudlan nako nitungod man pud ni sa atong kawad-on. Kay okay lang unta si ate nagapadala unya kadtong pag atake nimo wa man koy maduolan kay tinuod naa tay mga parente pero dili mana forever motabang sa atoa kay pait pud,” dugang ni Lablab

Gipahugtan usab sa Provincial Rehabilitation Center, ubos sa pagpangulo ni Provincial Warden Matulac, ang siguridad sulod sa pasilidad, subay sa mando ni Gobernador Edwin I. Jubahib, aron mapugngan ang pagsulod sa bisan unsang kontrabando, ilabi na ang iligal nga droga, sulod sa mga pasilidad sa probinsya.

One DavNor Network