Khó-ài ê Siû-jı̂n 01 - Wiki Tô

跳至內容

• Bûn-chiuⁿ
• Thó-lūn

閩南語 / Bân-lâm-gí

• Tha̍k
• Siu-kái
• khoàⁿ le̍k-sú

Ke-si Ke-si 移至側邊欄 Bih 操作

• Tha̍k
• Siu-kái
• khoàⁿ le̍k-sú

It-puann

• Tó-ūi liân kàu chia
• Siong-koan ê kái-piàn
• Kā tóng-àn chiūⁿ-bāng
• Éng-kiú liân-kiat
• Ia̍h ê chu-sìn
• Ín-iōng chit phiⁿ bûn-chiuⁿ
• Hōo-lâng té bāng-tsí
• Hōo-lâng hā-tsài QR bé

Ìn-soat/su-chhut

• Ìn-soat pán-pún
• 下載 EPUB
• 下載為 MOBI
• 下載為PDF
• 其它格式

Chí-mōe kè-ōe Guā-māu 移至側邊欄 Bih 下載 Ùi Wiki Tô·-su-kóan 1. Khâm-khia̍t Ê Lō͘-thêng Lân-hiong thàu-chá khí-lâi ta̍k hāng khoán hó-sè, chiū chiàu-siông khı̀ chhut-khı̂n. I sı̄ tı̄ bó͘ keng Ki-tok-kàu pı̄ⁿ-ı̄ⁿ choè hō͘-sū. Boē lâi pı̄ⁿ-ı̄ⁿ í-chêng sı̄ tı̄ lán ê kàu-hoē ê lú-o̍h chho͘-tiong pit-gia̍p. Āu-lâi khó-jı̍p i-ı̄ⁿ lâi choè hō͘-seng. Tı̄ i-ı̄ⁿ í-keng choè kang iok 6 nı̂, tı̄ i ê bō-á í-keng ū chı̍t sûn o͘-sûn, in-ūi i ê sêng-chek te̍k-pia̍t hó, choè lâng un-sûn, thiâm-chēng, khı̂n-khoài, chhin-chhiat, só͘-í tùi hō͘-sū tiong siū soán-poa̍t choè chı̍t kho ê niá-pan. Hiān-chāi i sı̄ choè goā-kho ê hō͘-sū pan-tiúⁿ; i ê ē-bı̄n ū 5, 6 ê tâng-kang, tāi-ke chin chun-kèng i, chin sio thiaⁿ-chhùi, tâng-sim lâi ho̍k-bū pı̄ⁿ-lâng, só͘-í ı̄ⁿ-tiúⁿ, hō͘-sū-tiúⁿ to͘ chin tùi-tiōng--i. Lân-hiong sèⁿ Lí, só͘-í it-poaⁿ ê lâng lóng kiò i choè “Lí sió-chiá,” nā-sı̄ in ê tâng-phoāⁿ tāi-ke kiò i choè “Lân-hiong ché.” Lí sió-chiá sı̄ tı̄ Tâi-lâm tang-pêng, jı̍p soaⁿ lı̄ iok oá Tâi-oân lí saⁿ sı̀ phò͘-lō͘ ê chı̍t ê soaⁿ-lāi kàu-hoē ê cha-bó͘ gín-ná. I chí-ū saⁿ ê chí-moē-á, i pâi tē-jı̄--ê, tng i sı̀ hoè ê sı̂, i ê lāu-bú koh seⁿ sió-moāi-á, tı̄ goe̍h-lāi ê sı̂ thó͘-oē kóng tio̍h goe̍h-lāi-hong, soà lı̄-khui sè-kan. Tng lāu-bú pia̍t-sè ê sı̂, sı̍t-chāi chin khó-lı̂n. Hit tng-sı̂ Lí sió-chiá ê ché-ché chiah 7 hoè, i pún-sin 4 hoè, sió-moāi tú chhut-sı̀. Lāu-pē tong-sı̂ 30 hoè, téng bô chhin, ē bô chhek, lāu-pē sı̄ chı̍t ê toaⁿ-sin-hàn, tùi hái-kháu lâi soaⁿ-lāi hō͘ lāu-bú chio--ê. Kóng khí-lâi iā sı̄ chin kı̂-iân, lāu-pē sı̄ hái-piⁿ thó-hı̂ lâng ê kiáⁿ, sè-hàn pē-bó chá sí, siàu-liân tng ióng ê sı̂, i iàm-hı̄n tı̄ hái-nih mō͘-hiám, chiàn hong-éng lia̍h-hı̂ ê seng-oa̍h, koh i nā koh siūⁿ-khí i choè gín-ná sı̂-tāi ê kéng-gū, kàu chit sı̂ nâ-âu-kńg to͘ iáu ē tı̄ⁿ, ba̍k-sái to͘ khoà ba̍k-kı̂ⁿ. Kóng khí--lâi oē-thâu tn̂g, Lân-hiong ê lāi-kong chiū-sı̄ Pò͘-tē hit kak-sı̀ ê lâng. Tang-chio̍h, Pò͘-tē, Pak-mn̂g hia ê lâng lóng sı̄ teh lia̍h-hı̂, pha̍k-iâm lâi koè-jı̍t. Nā ū choh-sit iā sı̄ ke̍k sió-khoá, tāi-ke choh m̄ chiâⁿ-mı̍h. Sı̄ sán-soa hn̂g-á, sı̄ hong-thâu, chúi-boé, hong chin thàu, ū sı̂ hái-chúi-ian phah-chiūⁿ lio̍k-tē, ná chún teh lo̍h kiâm-hō͘ leh. Só͘ chèng--ê sı̄ han-chı̂, lō͘-sé, thô͘-tāu, siông-siông khiàm chúi, siu-sêng sı̄ m̄ chiâⁿ-mı̍h. Só͘-í chē-chē lâng khò thó-hái, á-sı̄ khı̀ chè-iâm kong-si choè khó͘-kang lâi tō͘-oa̍h. Án-ni Lí--ka chū chá sı̄ chin kan-khó͘, chin chheng-tām. Hit nı̂ te̍k-pia̍t pháiⁿ nı̂-tang, só͘-í Lân-hiong in lāi-kong iā kap lâng choè-tı̄n khı̀ chhut-hái. Bô phah-sǹg hit nı̂ m̄-nā ngó͘-kok pháiⁿ nı̂-tang, chiū hái-nih iā pháiⁿ hái-tang. Só͘-í tāi-ke chiū chham-siông khı̀ khah oán-iûⁿ lâi thó, ǹg-bāng ē tit thó khah ū. Bô phah-sǹg, chı̍t ē khı̀ soà bô hoê-thâu, in-ūi tng in khui-phâng ê 3 jı̍t āu choè hong-thai, ún-tàng sı̄ sit-sū. Hong-thai āu tán chı̍t lé-pài, nn̄g lé-pài, kui goe̍h-jı̍t, lóng bô siau-sit. Chhù-piⁿ ta̍k ê thè Lí Sian-siⁿ-niû, pêng-sı̂ lâng lóng kiò i “Chı̀n-châi só” chin hoân-ló. Chı̀n-châi hiaⁿ, Lân-hiong ê lāi-kong sit-sū hit sı̂, in lāu-pē chiah 6 hoè. Chū sè seⁿ-choè sán-sán, kha-lò chhiú-lò, i ê chiàⁿ-miâ kiò-choè Lí Éng-hok, nā sı̄ in-ūi i ê kha-lò chhiú-lò, sui-jiân sı̄ 6 hoè, khoàⁿ-tio̍h ná chún 7, 8 hoè khoán leh; só͘-í tāi-ke to͘ kiò i choè “Lò-kha--ê.” Chı̀n-châi só mı̂-jı̍t lâu ba̍k-sái thı̂-lâm khàu-lūi, chhe-it cha̍p-gō͘ siông-siông to͘ tiám-hiuⁿ kūi tiàm tiâⁿ-boé khui-siaⁿ khàu, siaⁿ-siaⁿ kù-kù “Goá sim-koaⁿ, goá hu o-oè, lí kin-á-jı̍t pàng-sim choè lí khı̀, khoàⁿ lí pàng goá kap lò-kha-á kiáⁿ beh cháiⁿ-iūⁿ ?” Khàu tit phı̄ⁿ-lâu noā-tih, hō͘ chhù-piⁿ ê lâng tāi-ke thè i chin siong-sim. Tiàm sı̄ chı̍t keng hái-piⁿ liâu-á, hō͘ lâi chhop8-chhop8 tih, hong lâi phoà-piah hong sǹg-sǹg háu, koâⁿ gih-gih, kah sı̄ chı̍t niá phoē ná-chún lo̍k-bah-pó͘, kah thâu kha thó͘, kah kha thâu thó͘, kah pak-tó͘ sı̄ siang-thâu thó͘. Phoē-toaⁿ phoà kô͘-kô͘ iā bô thang pó͘, siūⁿ lâi chiū-sı̄ khó͘. Chhù-piⁿ hiah-ê pô-ah chím-ah khah nńg-sim ê lâng nā thiaⁿ i teh hàu-pn̄g, teh khàu, chē-chē lâng tiàm piⁿ-á thè i àm-chı̄ⁿ lâu ba̍k-sái, siūⁿ kóng chit-ê siàu-liân-lâng khoàⁿ beh án-choáⁿ khan-kiáⁿ chiú chı̍t-sı̀-lâng chiū hó. Koè nı̂-goā kú, to͘ lóng bô tò-lâi lah, chhù-piⁿ ê lâng chiū khó͘-khǹg i koh kè. Khí-thâu Chı̀n-châi só chin sioh pún-hūn, siūⁿ kóng lán sı̄ sàn-hiong lâng, m̄-bat poàⁿ jı̄, koh khan chı̍t ê kiáⁿ, taⁿ lò-kha--ê iā 8 hoè lah, lâng thái ē beh ài lán lah? Só͘-í chin siú pún-hūn, kap kiáⁿ chhut-khı̀ khioh han-chı̂-á tō͘ koè-jı̍t. Nā khah lāi-bı̄n-sı̀ ê hiong-chhoan teh kheh kam-chià ê sı̂, chiū chhoā kiáⁿ khı̀ kā lâng lân chià-kin, pak chià-ha̍h lâi thàn koá chı̂ⁿ tò-lâi bé kiâm-hı̂-á, taⁿ koá chià-ha̍h tò-lâi choè chhâ hiâⁿ. Án-ni bóng péng, bóng tō͘ koè-jı̍t. Tú-gū lò-kha-á kiáⁿ 8 hoè nı̂-boé, keh-piah chng ū chı̍t ê lâng kiò-choè Sin-hoat-ah, i sı̄ tı̄ chè-iâm kong-si teh choè kang-iú, pha̍k iâm ê kang-lâng, sí bó͘, pàng nn̄g ê gín-ná; lâng chiū lâi kā Chı̀n-châi só-ah pò chhin-chiâⁿ, tāi-ke chin kā i chàn-sêng, khoàⁿ iáu chiah siàu-liân, Chı̀n-châi hiaⁿ sí-lo̍h, chhân bô chı̍t khu, hn̂g bô chı̍t tu, khoàⁿ beh chiú kàu siáⁿ-sı̂ lò-kha--ê chiah ē toā-hàn. Sin-hoat hiaⁿ to͘ iā khiàm kha-chhiú, chhit-kóng peh-kóng, hit nı̂ tang-cheh-mı̂ tāi-ke chiū sêng-chhin. Bô loā-kú tùi gín-ná chiū tiāⁿ khí toā-lâng sū. Lò-kha--ê kap āu-chek ê kiáⁿ sǹg-lâi sı̄ chiap-bı̄n sió-tı̄, sió-moāi tiāⁿ oan-ke. Sin-hoat hiaⁿ iáu ū chı̍t ê lāu-bú, kin-nı̂ chiah oá 60 thóng hoè. Hái-kháu lâng chin chho͘-kiāⁿ, iáu ē chhut-khı̀ sa-chhâ la̍k-chháu, kóng oē siaⁿ hiáng, lı̄-hāi, tı̄ in chè-iâm kong-si ê kang-liâu, kang-iú ê siok-sià bē su sı̄ lāu ke-pô, cha-bó͘ chóng-lí. Lâng nā gín-ná thâu-sio hı̄ⁿ-joa̍h, khan âng-ı̂, koan saⁿ-ko͘-á, to͘ lóng sı̄ i teh thè lâng siat-hoat. Mn̄g-pu̍t sio-hiūⁿ, lâng poa̍h-poe nā poa̍h bô, to͘ lóng sı̄ i teh thè lâng hē-sı̂n thok-pu̍t. Pêng-sı̂ sı̄ chin khek-po̍k, koé sǹg ê, bah sǹg tè. Lēng-goā chhòng chı̍t kha chhài-nâ, sı̄ nı̂ peh cheh, ū koé-chàng, ke, ah, ti-bah, to͘ the̍h-khı̀ khǹg chhài-nâ, siu tiàm i ê pâng-keng bı̂n-chhn̂g chêng, tiàu koân-koân. Nā m̄-sı̄ in cha-bó͘-kiáⁿ tò-lâi choè-kheh, sı̄ bô lâng chia̍h ē tio̍h. Kàu chia Lò-kha--ê in bó-á-kiáⁿ chai sí lah. Phah-mē ū, chia̍h-chhēng bô. Kó͘-chá lâng kóng, “Chia̍h lâng ba̍k-sái lâu-pn̄g, saⁿ tǹg gı̂n-oáⁿ gı̂n-tı̄.” Bó-á-kiáⁿ nā chhoā chhut-khı̀ choè kang, siông-siông tı̄ hn̂g-thâu hn̂g-boé tùi-khoàⁿ lâu ba̍k-sái. 2. Tūi-lo̍h Siāng hit-nı̂ beh kı̄n nı̂-tau ê 29 mê, ke-ke hō͘-hō͘ lóng teh pı̄-pān koè-nı̂, ū ê chhoe-koé, ū ê thâi-ke, taⁿ Chı̀n-châi só tú kè-lâi bô loā-kú, pêng-sı̂ sı̄ sàn-hiong lâng, koè-khı̀ m̄-bat ka-kı̄ chhoe-koé pa̍k-chàng. Taⁿ hāi-lah, chhoe-koé m̄-chai thang hē koé-khùi, koé chhoe bē-se̍k, hoat-koé chhoe bē hoat, in ta-ke tùi goā-bı̄n jı̍p lâi khoàⁿ chı̍t-ē hoé chhiong-thiⁿ, lóng bô kóng sím-mı̍h, chū án-ni oat jı̍p-khı̀ pâng-keng, khui-siaⁿ khàu in sí khı̀ ê hit-ê sim-pū. Siaⁿ-siaⁿ, kù-kù, goá kim sim-pū kin-á-jı̍t choè lí khı̀, khoàⁿ kin-á-jı̍t koh chhoā che ná ū lō͘-ēng. Tùi hia khí Chı̀n-châi só ná bô in lāu ta-ke ê iân. Koè-nı̂ mê-hng tāi-ke teh ûi-lô͘, lò-kha--ê lâng iā bô kiò i oá-khı̀ chia̍h, i ka-kı̄ iā m̄-kâⁿ oá-khı̀ toh-téng chia̍h-pn̄g. Chêng seⁿ--ê toā-sun sè-sun án-má chı̍t lâng giâ chı̍t ki ke-thúi hō͘ i, ta̍k ê chia̍h kàu tin-tin iú-bı̄, lò-kha Éng-hok-ah, khiā tiàm hō͘-tēng-piⁿ thun chhùi-noā, ba̍k-chiu kim-kim-siòng, iā bô lâng ē chhut-tit the̍h chı̍t-tè hō͘ i. Lāu-bú ê sim chhin-chhiūⁿ beh iûⁿ la̍k-khı̀ ê thiàⁿ. Siūⁿ kóng lán kin-á-jı̍t pháiⁿ-miā chiah tio̍h lâi án-ni, kín kā i nih-ba̍k kiò i cháu. Thèng-hāu lâng bô khoàⁿ-kı̀ⁿ ê sı̂, thau iap chı̍t ki ke-kha hō͘ i chūiⁿ-chūiⁿ leh, tı̄ pâng-nih thau kā i kiáu chı̍t thng-sı̂-á ti-iû chham iâm-hoe-á hō͘ i chia̍h. Ba̍k-chiu khui liáu-liáu, sı̄-kín saⁿ-chhùi choè nn̄g-chhùi pe, kín chia̍h liáu-liáu. Nā-sı̄ chin tú-hó chiap-bı̄n má jı̍p--lâi, khoàⁿ i tı̄ chàu-kha chhùi iáu teh pō͘, chiū án-ni tı̍t-mē, mē kóng lí che phoat-hū, pāi-ke-pô, tiàm chàu-kha bó-á-kiáⁿ teh thau hàu-ko͘ sím-mı̍h? Tı̍t-tı̍t kā in sim-pū thoa, thoa kiò i tio̍h khı̀ kong-má ê bı̄n-chêng chiù-choā khoàⁿ i chia̍h sím-mı̍h? Hit-àm Chı̀n-châi só soà siūⁿ té-lō͘, siūⁿ beh tiàu-tāu chū-chı̄n, ka-chài hō͘ in chiap-kha-ang Sin-hoat hiaⁿ chá khoàⁿ--tio̍h, kín kiù chiah bô sí. Chóng-sı̄ tùi hit-àm khı̀ liáu soà phùi-huih, soà tiāⁿ-tiāⁿ sàu. Koè-nı̂ āu, chū án-ni hō͘ lò-kha Éng-hok-ah khı̀ kā lâng khan gû-á tō͘ pá. Hit-sı̂ Éng-hok-ah chiah 9 hoè, chiū khı̀ kā chı̍t ê sèⁿ Lı̂m--ê in chhı̄ gû, àm-sı̂ khùn tı̄ gō͘-keng-boé ê gû-tiâu, bô báng-tà, tiāⁿ hō͘ báng tèng, put-sı̂ koâⁿ-jia̍t-á, bı̄n n̂g phi-phi, ū sı̂ khı̀ chhı̄ gû tò-lâi, koâⁿ-jia̍t-á tú kàu, kha choân lō͘-ko͘-moâi bô khoà sé, chū án-ni tó tiàm i khùn ê ūi khū-khū chun, iā bô lâng chhap--i. Nā-sı̄ beh tò-khı̀ āu-chek in tau iā-sı̄ bô lō͘, só͘-í ka-tı̄ chı̍t ê siông-siông thau háu. Sui-jiân sı̄ sè-hàn, iáu-kú ē hiáu bô pē ê chhiⁿ-chhám. Keh-nı̂ 10 hoè, in lāu-bú hō͘ ta-ke khó͘-to̍k kek-sim, sàu ná siong-tiōng, soà chiâⁿ lô-siong, kàu Éng-hok-ah 10 hoè nı̂-boé in lāu-bú chiū sí-khı̀ lah. Án-ni thiⁿ-ē sui-bóng sı̄ khoah bóng-bóng, chhoē kut-jio̍k sı̄ bô poàⁿ ê. Chū án-ni tı̄ Lı̂m Sian-siⁿ in-tau chhı̄ gû-á koè-jı̍t, chū-jiân sı̄ bô ki-hoē thang tha̍k-chheh; in āu-chek iā bô lâi sêng-jı̄n, hō͘-kháu sı̄ tông-ki-jı̂n, só͘-í chin-chiàⁿ sı̄ chiâⁿ choè liû-lı̂ sit-só͘ ê ko͘-jı̂. Kàu 15, 6 hoè ê sı̂ chiū khah tam sin-miā, sı̀-kè kā lâng choè té-kang-á, thàn-chı̂ⁿ lâi tō͘-oa̍h, iû hú chia̍h hú, iû koān chia̍h koān, ū sı̂ tı̄ hái-kháu, ū sı̂ tı̄ to͘-chhı̄, ū sı̂ tı̄ lāi-soaⁿ lâi choè kang. Tng oá 20 hoè ê sı̂, bat tı̄ to͘-chhı̄ toè thô͘-chúi kang, in-ūi i kut-la̍t, iā chám-jiân ū hō͘ i thàn koá chı̂ⁿ; chóng-sı̄ o̍h pháiⁿ 3 jı̍t, o̍h hó 3 nı̂, soà o̍h ē chia̍h-hun, soà ē lim-chiú, tê tiàm-á chı̍t keng kiâⁿ koè chı̍t keng, soà ē khı̀ ki-lâu phiâu-ki; chū-jiân bô châi-tiāu khı̀ siōng-liû--ê, sı̄ khı̀ hit hō saⁿ-liû--ê, kı̄n tı̄ poàⁿ iám-mn̂g-á hit khoán, nā m̄-sı̄ tı̄ “Thian-thian-lo̍k”, chiū-sı̄ tı̄ “Bān-lí-hông”, á-sı̄ “Chhian-lí-iân”, teh chhut-jı̍p, chiah-ê miâ-hō chin hó, kı̂-sı̍t sı̄ lô-tōng-kài ê kong-kiōng e̍k-keng, ke̍k bô oē-seng, bián loā-kú chiū jiám-tio̍h hoa-liú-pı̄ⁿ, bē thàn, ke khai, chiū liû-lo̍h tı̄ koh-khah o͘-àm ê seng-oa̍h. Chı̍t jı̍t sûi-thâu tàm-chı̀ khı̀ phēng tı̄ Sêng-hông-iâ biō-piⁿ ê chhiûⁿ-piah, sı̂-kan í-keng bô chá lah. Tú teh siūⁿ kin-mı̂ m̄-chai beh khı̀ tó-ūi khùn, khı̀ khùn ti-tiam sı̄ siông-siông ê sū. Tú gia̍h-thâu siūⁿ beh koh khı̀ tang chhı̄-tiûⁿ chhoē ti-tiam, tú tio̍h chı̍t ê lâng chin hiông, cháu tùi i ê bı̄n-chêng koè, sūn-soà kā i kiò, “Iú--ê lâi leh, hó khang--ê lí beh choán chı̍t--ê bô?” I ê sim tú-tú teh siūⁿ bô pō͘, iā bô mn̄g khoàⁿ sı̄ sím-mı̍h hó-khang--ê, chiū toè i kiâⁿ, kiâⁿ kàu chı̍t-ūi àm-àm ê ūi, hit-ê lâng kā i kóng, lí tiàm chia khiā, khoàⁿ ū lâng tùi chit tiâu hāng-á lâi á-bô, nā pêng-siông lâng, lí tèⁿ m̄-chai, bóng kiâⁿ tín-tāng chiū hó, nā kéng-chhat lâi lí tio̍h khām-sàu nn̄g ē, hit-ê lâng chū án-ni thiàu tùi lâng ê chhiûⁿ-á-lāi jı̍p-khı̀. Hit-sı̂ i chiah chai hit-ê lâng sı̄ beh choè chha̍t-á, kiò i pé-hong, choè khoàⁿ-thâu. Hit-ê chha̍t-á sı̄ Pak-pō͘ chin chhut-miâ ê kah-kip ê lô͘-moâ, in ê tóng ū 12 seⁿ-siùⁿ, chit-ê lâng ê phian-hō kiò-choè “Sió-kâu,” ı̀-sù sı̄ kha-chhiú chin hó peh koè chhiûⁿ, tú gia̍h bān-lêng só-sı̂ khí lâi beh kā lâng khui-mn̂g ê sı̂, tú hō͘ chú-lâng ê kun-iōng-káu khoàⁿ--tio̍h, chek-sı̂ khui-siaⁿ pūi; khoàⁿ bē choán-chia̍h-tit, siám tùi chàu-kha-āu àm-àm ê só͘-chāi, poâⁿ-koè āu-bı̄n-chhiûⁿ koh chhut-lâi choè i cháu. Nā-sı̄ chú-lâng thiaⁿ tio̍h koh-iūⁿ ê siaⁿ, chek-sı̂ tui chhut--lâi, Éng-hok-ah gām-bı̄n gām-bı̄n, i m̄-bat ō͘-á han-chı̂, m̄-chai ti-bó-phoê lūn-lūn, lia̍h-chún ū hó-khang thang choán, taⁿ káⁿ ū sím-mı̍h thang pun; iáu teh siūⁿ kàu sim chû-chû ê sı̂, lâng jiok kàu, chū án-ni kā i thoa khı̀ phài-chhut-só͘; beh kóng bô, bêng-bêng sı̄ choè chha̍t-á ê pé-hong; beh kóng ū, sı̄ chin-soe, bē-su hō͘ mô͘-sı̂n-á mo͘-tio̍h; choè chha̍t sim hi, chı̍t ē hêng lo̍h-khı̀, chiū jı̄n chhut--lâi. Bêng-bêng sı̄ chhiap-tō ê kiōng-bô͘, kiò i tio̍h keng-chhut kiōng-hoān, hit-ê chú-hoān sı̄ sím-mı̍h lâng. Taⁿ tio̍h kúi phah tio̍h lah, liân lâng to iáu-bē cha̍p-hun ē jı̄n-tit, miâ beh thái ē bat i chiū hó, jı̄-chhiáⁿ hit àm goe̍h hoáⁿ-o͘ hoáⁿ-o͘, koh hit-ê lâng chhēng o͘-saⁿ o͘-khò͘, chhēng o͘ phâng-pò͘-ê, tı̀ o͘ phah-chiáu-bō-á, āu-lâi bı̄n pau o͘-hoe-kin-á, sı̍t-chāi sı̄ m̄-chai hit-ê lâng hō choè sím-mı̍h miâ, khah hêng to͘ kóng bē chhut--lâi. Só͘-í chiū kā i sàng khı̀ kéng-chhat-kio̍k, sak-lo̍h khu-liû keng-á thèng-hāu bı̂n-á-chài. 3. Kı̂-iân Keh bı̂n-á-jı̍t tùi kéng-chhat-kio̍k ê khu-liû kaⁿ-pâng toà i chhut--lâi, khah mn̄g mā-sı̄ m̄-bat hit lâng ê miâ. Āu-lâi mn̄g i chiàu só͘ ē kı̀-tit hit-ê lâng ê hêng-siòng. Koân iok 5 chhioh-poàⁿ, seⁿ choè bô pûi, iā bô sán. Khí-thâu kap i choè-hoé kiâⁿ ê sı̂, ū khoàⁿ-kı̀ⁿ i ê bı̄n, chhùi-ē-táu chiam-chiam, chhùi-ē-táu ê tò-pêng ū chı̍t lia̍p kı̀, ū hoat kı̀-chhiu, chiàⁿ-pêng ê ba̍k-chiu boé ū to-khı̂, tāi-khài sı̄ hō͘ lâng phut--tio̍h ê to-siong; choè-hoé kiâⁿ kàu hāng-á-lāi àm-àm ê só͘-chāi, hit-ê lâng chiah chiong bō-á tı̀ khàm-khàm, tùi khò͘-tē-á jı̂m chı̍t-tiâu hoe-hoe ê kin-á khí-lâi pau bı̄n, chí-ū chhun ba̍k-chiu thang khoàⁿ lō͘, chiū poâⁿ koè chhiûⁿ. Kéng-chhat-kio̍k chiàu chit-ê lâng-siòng lâi péng hiah-ê liû-bı̂n, chiân-kho-hoān só͘ lâu teh ê siōng, chiū hoat-hiān tio̍h só͘ kóng ê bı̄n-siòng, sı̄ lô͘-moâ cha̍p-jı̄ siⁿ-siùⁿ tiong ê sió-kâu sı̄ hiâm-gı̂-hoān. Tùi án-ni chiū hoat-chhut kéng-kài bāng pau-ûi. Tı̄ kéng-chhat-kio̍k, tùi chiah-ê liû-bı̂n kap siông-sı̍p-hoān, á-sı̄ su-siúⁿ khoàⁿ-choè put-ún ê lâng, m̄-nā ū in ê siòng, sı̄m-chı̀ chı̄n só͘-ē to lóng ū chhái-chı̍p in ê kha-bô͘, chhiú-ı̀n kap chéng-thâu-á hûn. In-ūi che sı̄ chin hó ê so͘-cha chhâi-liāu. Só͘-í liam-piⁿ tit-tio̍h hiâm-gı̂-hoān ê soàⁿ-soh. Sió-kâu m̄-nā kan-ta sı̄ chhiap-tō-hoān, kı̂-sı̍t i put-lūn kiông-kan, cha̍h-lō͘ chhiúⁿ-kiap, sat-jı̂n to lóng káⁿ-choè. I sı̄ chı̍t ê hoān-choē lúi-lúi ê thong-chhip-hoān. I tı̄ téng goe̍h-jı̍t chiah tı̄ Biâu-lek jı̍p-soaⁿ ê sió chng-siā, phiàn chı̍t ê cha-bó͘ gín-ná, kóng beh chhoā i khı̀ chia̍h thâu-lō͘, chiah tı̄ lō͘-tiong m̄-nā kiông-kan-ù hit-ê lú-chú, koh kā i chhiúⁿ chhiú-pió, kap chı̍t-tiâu kim-liān-á nn̄g-chı̂ⁿ goā tāng, koh hiān-kim chiâⁿ pah-kho͘, chhùi kā i that chhiú-kin, chhiú kā i pa̍k iap-āu, chiong poàⁿ lō͘-thé kā i hiat tiàm chin chió-lâng teh chiūⁿ-lo̍h ê sió lō͘-piⁿ ê chhiū-nâ àm-sàm ê só͘-chāi. Hit-ê lú-chú bē-tit jiáng, in-ūi chhùi that tiâu-teh, iā m̄-káⁿ kā i jiok, á-sı̄ cháu chhut-lâi pò, in-ūi chhiú hō͘ i pa̍k iap-āu, poàⁿ lō͘-thé m̄-káⁿ chhut-lâi kı̀ⁿ-lâng, só͘-í chí-ū ku tiàm chhiū-á-kha háu, kàu ū lâng khı̀ khioh-chhâ tùi hia koè, chiah kā i kiù. Chhin-chhiūⁿ án-ni bû-ok put-chok. Lò-kha Éng-hok-ah sûi-piān chiū toè lâng khı̀, kóng ū hó-khang--ê, khoàⁿ beh choán á-bô, sı̍t-chāi chin kai-sí. So͘-cha-bāng tı̍t-tı̍t siok-siáu, āu-lâi tı̄ Koan-biō beh jı̍p-khı̀ Kı̂-san ê lō͘-tiong ê soaⁿ-lāi lia̍h--tio̍h. I sı̄ Tâi-pak ê Sin-tiàm Àm-kheⁿ ê lâng, ūi-tio̍h tı̄ pak-pō͘ hoān-àn, tı̍t-tı̍t cháu lo̍h lâm, só͘-í chiah ē tı̄ Koan-biō ê hū-kı̄n hō͘ lâng lia̍h-tio̍h. Thang-kóng phò-àn iā-sı̄ chin kín, thâu-boé bián 10 goā-jı̍t chiū lia̍h--tio̍h. Tı̄ kong-têng tùi sı̀n ê sı̂, hō͘ Lò-kha Éng-hok-ah jı̄n, kó-jiân bô chhò, chiàu nn̄g pêng ê kháu-keng jı̄n khí--lâi, chiū chai Éng-hok kó-jiân m̄-sı̄ chin tāng ê choē-hiâm, só͘-í phoàⁿ-koat khin-khin, koaiⁿ 6 kò-goe̍h kià choē nn̄g-nı̂, chiū siū tháu-pàng chhut-kaⁿ. Tı̄ siū koaiⁿ ê tiong-kan, tı̄ kaⁿ-ga̍k ê i-bū-sek, sin-thé tit-tio̍h i-tı̄, koh tit-tio̍h chin toā ê kà-sı̄. Hit chiah sió-kâu chiū siū tēng-choē khah-kú, tı̄ chia lán m̄-bián kóng. Éng-hok-ah siū tháu-pàng liáu-āu, kia̍h-ba̍k bô chhin, sin-nih bô poàⁿ sián chı̂ⁿ, sim siūⁿ kóng, taⁿ beh khı̀ tó-ūi sı̄ hó. Sı̍t-chāi chin-chiàⁿ sı̄ sim loān-loān bô tiāⁿ. Put-kò chiàu i koè-khı̀ ê keng-giām, ná-chún ū chı̍t ê siaⁿ kóng, m̄-thang koh tiàm siâⁿ-chhı̄, siâⁿ-chhı̄ sı̄ khoài tūi-lo̍h chhia-hoâ ê só͘-chāi. Só͘-í bô ı̀-sek, put-ti put-kak hiòng Tâi-lâm ê tang-pêng soaⁿ-lāi tı̍t-tı̍t kiâⁿ-khı̀, hit ē-po͘ oá saⁿ-tiám cheng chhut-kaⁿ, thâu-khak chhih-chhih tı̍t-tı̍t tōng, tōng tùi Éng-khong, kàu Sin-hoà hit sı̂, jı̍t to í-keng beh àm lah, nā-sı̄ sim cha̍t-cha̍t iā m̄-chai iau, tiàm Sin-hoà ke-á kiâⁿ-lâi, kiâⁿ-khı̀, kin-pún seng-khu tn̄g poàⁿ-bûn, iau iā-sı̄ bô hoat-tō͘. Hit-àm chiū khı̀ ku biō-kháu, phēng tiàm toā-biō ê thiāu-thâu, poàⁿ khùn, poàⁿ chhíⁿ koè chı̍t-mı̂. Keh chá-khí pak-tó͘ kám-kak chin iau, nā-sı̄ sin-nih bô chı̂ⁿ, iā sı̄ bô pān-hoat, chiū kiâⁿ chhut ke-á, ǹg soaⁿ lāi ê lō͘ tı̍t-tı̍t kiâⁿ, tú-gū lō͘-nih ū lâng teh chhia kam-chià, chiū kā lâng pun kam-chià chia̍h, chek-sı̂ kám-kak ke chin ū goân-khı̀, chiū kè-sio̍k koh kiâⁿ. Tàu-tí jı̂n-kan tông chêng saⁿ pang-chān ê sim, iû-goân sı̄ tı̄ hiuⁿ-ē khah ū. Siâⁿ-chhı̄, to͘-hoē ê lâng, ná-chún ta̍k-ê m̄-chai sı̄ khah bô êng, khah bô sı̂-kan thang siūⁿ kàu pa̍t-lâng ê tāi-chı̀, á-sı̄ cháiⁿ-iūⁿ. Kám-kak ke chin kò͘-kí, ná-chún sio̍k-gú kóng jı̍t-thâu kng-iāⁿ-iāⁿ, sûi-lâng kò͘ sı̀ⁿ-miā ê khoán. Kám-kak chhin-chhiūⁿ jı̂n-chêng chin peng-léng, tı̄ hiuⁿ-ē kám-kak tāi-ke khah un-loán, nā kàu tı̄ soaⁿ-kan, tı̄ phok-sò͘ ê seng-oa̍h ê lông-bı̂n ê tiong-kan, só͘ ū ê iú-chêng, sı̄ ná-chún kèng koh-khah sio-lō. Kàu tàu ê sı̂, i chiū kiâⁿ kàu Soaⁿ-pà. Tı̄ hia ū chı̍t-keng Ki-tok-kàu ê lé-pài-tn̂g. I pêng-sı̂ bô thiaⁿ tō-lí, chū-jiân i iā m̄-chai hia sı̄ pài-tn̂g, put-kò i kám-kak tı̄ chiah soaⁿ-lāi, ū chiah toā-keng ê chhù, sı̄ chin hi-hán, i chiū kiâⁿ oá-khı̀ kā i khoàⁿ, soà tı̄ pài-tn̂g mn̂g-kháu liâng-liâng ê ūi chē. Hit-sı̂ tú-gū ū chı̍t ê lāu sı̀n-tô͘, lâng lóng kiò i choè A-thiam-peh, i sı̄ sèⁿ Bo̍k kap A-thiam-ḿ nn̄g-lāu í-goā, ke-lāi chí-ū chı̍t ê cha-bó͘-kiáⁿ, án-ni chı̍t-ke saⁿ ê choè-hoé toà. Khiok ū kúi hun-á chúi-chhân kap tām-po̍h soaⁿ-phiâⁿ, sǹg--lâi sı̄ bē kàu joā pháiⁿ-koè. M̄-kú bô hāu-siⁿ, ka-kı̄ iū lāu, lo̍h-chéng siu-koah lóng tio̍h chhiàⁿ--lâng, só͘-í iā m̄-sı̄ kàu joā hù-jū. I tú beh lâi chhoē bo̍k-su kóng-oē, khoàⁿ chit-ê chheng-liân tı̄ pài-tn̂g mn̂g-kháu chē, i chiū kā i mn̄g khoàⁿ chit ūi pêng-iú tùi tó-ūi lâi. Lò-kha Éng-hok-ah thâu-khak chhih-chhih, put-ti put-kak ba̍k-sái soà liàn chhut--lâi. A-thiam-peh khoàⁿ-liáu chin thè i siong-sim, chai i sim-lāi tek-khak sı̄ ū kóng bē chhut ê kan-khó͘, chiū chhiáⁿ i khı̀ in tau chē. In tau lı̄ pài-tn̂g bô joā-hn̄g, chhù khiok m̄-sı̄ chin hó, tek chha̍k--ê, chhēng chng-á ê chúi-kûn, khàm hiā, tēng-tauh tēng-tauh--ah, lāi-goā chin chheng-iu, iā ū chı̍t-ê sè-sè ê tiâⁿ-táu, tiâⁿ-boé iā ū chı̍t-châng tiⁿ iûⁿ-thô, chám-jiân toā-châng, chiàu-khoàⁿ ū 2, 30 nı̂ ê khoán ê lāu-chhiū, liu lo̍h-khı̀ ū chı̍t-tiâu sió khe-á, ū chē-chē hū-jı̂n-lâng thang sé-saⁿ ê chio̍h-thâu-ūi, oán-jiân chhin-chhiūⁿ chı̍t-pak ê tô͘-oē chı̍t-iūⁿ. Lâi phēng tio̍h Lò-kha Éng-hok-ah in hái-kháu, sı̄ thian chha iau ê khoân-kéng, chı̍t-sı̂ sim khui-khui khı̀. M̄-kú pak-tó͘ sı̍t-chāi sı̄ toā-tn̂g kò sió-tn̂g ê iau, ka-chài A-thiam-peh chin chai khin-tāng, siūⁿ kóng chia sı̄ soaⁿ-kan, tāi-khài chit-sı̂ tàu-lah, chit-ê chheng-liân-lâng káⁿ iáu-boē chia̍h ê khoán, chiū mn̄g i kóng, “Pêng-iú lí tiong-tàu kiám chia̍h-pn̄g lah.” Hit-sı̂ i khoàⁿ A-thiam-peh ê hó-ı̀, chiū iā bô sè-jı̄ kā i kóng, i iáu-boē chia̍h. A-thiam-peh chek-sı̂ kiò i ê cha-bó͘-kiáⁿ Chhiu-kùi-ah khoán chhut-lâi hō͘ i chia̍h. Chhiu-kùi-ah sui-jiân sı̄ soaⁿ-lāi cha-bó͘ gín-ná, nā-sı̄ i ū tha̍k-koè Kok-bı̂n ha̍k-hāu, koh tı̄ kàu-hoē choè gı̂m-si pan-oân, siaⁿ chin hó, chin oa̍h-tāng, tı̄ chheng-liân thoân khè tng ho̍k-bū-pō͘-tiúⁿ. Sı̄ chin khó-chhú ê lú-chú, tı̄ Soaⁿ-pà kàu-hoē thang kóng sı̄ soaⁿ-lāi ê hoe, kin-nı̂ tú 20 hoè. Lò-kha Éng-hok-ah sı̄ 21 hoè, tāi-ke téng-ē hoè. Chit tùi chheng-liân bô ı̀-tiong tāi-ke kı̀ⁿ-bı̄n ê sı̂, ná-chún ū chı̍t-ê bē-hiáu kóng ê kı̂-iân. Éng-hok-ah tùi án-ni chiū siū lâu choè lâng-kheh, chiām-sı̂ tiàm A-thiam-peh in-tau. Lâi-goân: "https://zh-min-nan.wikisource.org/w/index.php?title=Khó-ài_ê_Siû-jı̂n_01&oldid=4869" Lūi:

• Siáu-soat
• 1960
• Loā Jı̂n-seng
• Khó-ài ê Siû-jı̂n 01

Chhiau-chhoē Chhoē Khó-ài ê Siû-jı̂n 01 Ka-thiam gú-giân Ke chi̍t-ê toān-lo̍h