Goá Lâi--ah Moâ-tāu Hō͘ Tân Lûi Hiaⁿ - Wiki Tô·-su-kóan - Thâu-ia̍h

跳至內容

• Bûn-chiuⁿ
• Thó-lūn

閩南語 / Bân-lâm-gí

• Tha̍k
• Siu-kái
• khoàⁿ le̍k-sú

Ke-si Ke-si 移至側邊欄 Bih 操作

• Tha̍k
• Siu-kái
• khoàⁿ le̍k-sú

It-puann

• Tó-ūi liân kàu chia
• Siong-koan ê kái-piàn
• Kā tóng-àn chiūⁿ-bāng
• Éng-kiú liân-kiat
• Ia̍h ê chu-sìn
• Ín-iōng chit phiⁿ bûn-chiuⁿ
• Hōo-lâng té bāng-tsí
• Hōo-lâng hā-tsài QR bé

Ìn-soat/su-chhut

• Ìn-soat pán-pún
• 下載 EPUB
• 下載為 MOBI
• 下載為PDF
• 其它格式

Chí-mōe kè-ōe Guā-māu 移至側邊欄 Bih 下載 Ùi Wiki Tô·-su-kóan Goá lâi--ah, Moâ-tāu, Si-la-iah chó͘-má ê goân-hiong, Si-jı̂n lêng-kám ê goân-choâⁿ, Hit-siú “Éng-oán ê Kò͘-hiong” ín goá kàu chia, Chhiau-chhoē Tân Lûi iáu-boē tò-tńg ê kha-jiah. Lo̍h ko-sok kong-lō͘, Tân Lûi “hn̄g-hn̄g ê kò͘-hiong” Kı̄n-kı̄n pâi tı̄ goá ê ba̍k-chiu chêng. Bô khoàⁿ-tio̍h sè-lia̍p-chí, Chhiⁿ koh mo͘h-mo͘h ê bûn-tàn. Goe̍h-ı̂ⁿ hiah pá-chúi, n̂g-gín-gín ê pe̍h-iū, Tı̄ chhiu-thiⁿ koè-tàu ê jı̍t-thâu-kha, Chı̍t-lia̍p soà chı̍t-lia̍p, Chı̍t-láng soà chı̍t-láng, Chı̍t-tàⁿ chı̍t-táⁿ tha̍h kàu lō͘ ê chı̄n -pōng. Tı̄ png-á-chhiū ê kò͘-hiong, Chit-sı̂ kám teh lo̍h-sng? Pı̀n-piⁿ í-keng pe̍h ê Tân Lûi Kám ū teh sàu ti-koaⁿ-âng ê png-á-hio̍h? Kám ū ná gè phōng-kó, Ná hoê-sióng bûn-tàn ê sng-kam? Ná siàu-siūⁿ pe̍h-iū ùn tāu-iû Chı̍t-bān chı̍t-bān Chiàng-káng Moâ-tāu ê chu-bı̄? Se̍h-kàu Moâ-ha̍k-lō͘, Îⁿ-khoân bô--khı̀, Oáⁿ-koé-lân--a lâng-kheh goân-chāi chhàⁿ-chhàⁿ-chhàⁿ. Tân Lûi kám chai-iáⁿ, I ê kò͘-hiong ê oáⁿ-koé Í-keng chin chhut-miâ? Khiâ chhia-á tùi ha̍k-hāu tńg--lâi, Gín-á-sı̂ ê Tân Lûi Kám bat chē tı̄ chit-ê saⁿ-kak-thang chia̍h tiám-sim? Khiū-khiū ê koé, chiaⁿ-bah kah kiâm-ah-N̄g-jı̂n, Lām soàn-thâu tāu-iû-ko, Phoè chhá-mı̄, chhá-pn̄g, hı̂-kiⁿ ah-sı̄ ti-hoeh toā-tn̂g, Chhèng-ian ê lâng-sn̂g, Chhiⁿ-chhùi ê iân-sui, Kám bat phû tı̄ Tân Lûi bāng-tiong Kı̄n-kı̄n ê kò͘-hiong? Sái-koè toā-biō, Oat-jip piⁿ-á-lō͘, 3--goe̍h iū-á-hoe tng teh khui. Tiàu-cheng-hêng ê pe̍h-hoe thó͘-toā-khùi, Chhin-chhiūⁿ saⁿ sé-chheng-khı̀, Phi tı̄ tek-ko ê sat-bûn bı̄. Tha̍k-chheh ià-siān ê Tân Lûi Kám bat khiā tı̄ âng-hiā-chhù piⁿ-á, Kā kui-châng ê chheng-phang suh--jı̍p-khı̀? Chhun-thiⁿ ê khı̀-bı̄, Kám ū thàng kàu i ê sim-koaⁿ íⁿ-á, Tèng-jı̍p i tn̂g-tn̂g ê kı̀-tı̂? “Án-ne kám ē hô?” Thiaⁿ goá kóng tùi Ko-hiông cháu-lâi Moâ-tāu, Ta̍k-lé-pài pài-gō͘ ē-po͘ kan-taⁿ 2 tiám-cheng, Sái-chhia pí kà-chheh khah-kú, Kà bô lâng ai kà ê gí-giân-ha̍k khài-lūn, Tâi-gí-kài ê sian-pái tiāⁿ-tiāⁿ án-ne mn̄g. Liân pē-bú iā chhiò goá Sı̄ siōng gâu tha̍k-chheh ê gōng-kiáⁿ. M̄-kú goá chai Tân Lûi mā chai Goá bô khong iā bô gōng, Goá pí Tân Lûi khah hēng-hok. I “30 nı̂ poe-chiáu teh liû-lōng”, Goá ta̍k-lé-pài chún-sı̂ thàm-hóng i ê kò͘-hiong, Chò Tâi-gí-bûn ūn-tōng. Sè-kài tē-it Tâi-oân tē-it ê Tâi-oân gí-giân-ha̍k-hē, Siat tı̄ i ê kò͘-hiong ê ah-bó-liâu、un-á-piⁿ, Bô lâng beh lâi, Goá tāi-seng lâi. Tı̄ i khiàm-ēng ê sı̂-khek, Ū-hūn tı̄ i chhòng-pān ê kan-lân. Keng-koè Pak-sè-liâu, Ǹg-koè ko-sok kong-lō͘, Chı̍t-lō͘ oan-oan oat-oat, Bô khoàⁿ-tio̍h “lián-bū teh khui-hoe”, Bô khoàⁿ-tio̍h “chhân-iⁿ teh sńg-chúi”, Pe̍h-pe̍h pûi-pûi ê ah-á kap gô-á, Tı̍t-tı̍t ká-chúi khı̍t-kho̍k-haiⁿ ê chúi-chhia Ha̍k-hāu--nih kang-thêng-chhia kui-jı̍t kho̍k-kho̍k-lòng, Lāu-su chhoē-bô hioh-khùn ê só͘-chāi. Sè-kài tē-it-keng Tâi-oân gí-giân ha̍k-hē Tē-it-kài it-nı̂ ê ha̍k-seng, Tē-it-jı̍t siōng-khò bı̄n chiâu iu-iu, Ū-ê kóng hông phiàn-lâi chia, Ū-ê beh choán Tiong-bûn-hē, Ū-ê oàn kóng chia bô 7-11 (Seven-eleven), Ū-ê chèⁿ-kóng Tâi-gí bô téng-ı̂ Tâi-oân gí-giân, I beh jı̄m-tông in lāu-pē ê Tiong-kok, Iā ū lâng Tâi-gí thiaⁿ lóng bô, Kui-khı̀ hoah beh siau-bia̍t Tâi-oân, Lı̄-khui chit-ê “iū-á-tı̀n”. Hái-hong tùi Ka-lí-hin koàn--jı̍p-lâi, Kàu-sek--nih o͘-sek ê pò͘-lı̂ phia̍k kàu pho̍k-pho̍k-kiò, Thô͘-hún-soa iāⁿ tı̄ toh-téng, iāⁿ tı̄ o͘-pang ē-kha. Tân Lûi kám bat siūⁿ--koè Tńg-lâi kò͘-hiong ê lō͘ Ū joā khi-khiau? Ū joā tn̂g? Oá-kūn kò͘-hiong ê kha-pō͘ Ū joā m̄-kam? ū joā tı̂m-tāng? M̄-kú goá boē hoán-hoé, Iā boē oàn-thàn, Goá kā ka-kı̄ kóng, Goá pí Tân Lûi khah hó-miā. Ē-tàng tò--lâi, Ū-hūn chiàu-kò͘ lán ê Tâi-oân-kiáⁿ, Sı̄ i siōng him-siān ê thâu-lō͘, Sim-koaⁿ-té siōng súi ê tàng-tàⁿ. That-chhia ê sı̂-chūn ná haiⁿ Tâi-oân-tiāu, Ná khoàⁿ thang-á-goā hông-hun ê Chan-bûn-khe. Ǹg hái-kháu lâu ê jı̍t-thâu, Kám bat ek kàu Tân Lûi teh toà Thài-pêng-iûⁿ hit-pêng ê hái-hoāⁿ? Sàu png-á-hio̍h liáu-āu, Tân Lûi kám bat chē tı̄ chhiū-á-oe, Khoàⁿ thiⁿ-téng ê gān kui-tı̄n poe ǹg lâm? I kám ē kı̀--tit Gín-á-sı̂ tiàm -chúi-bih ê chit-tiâu-khe? Tháu-bán si-koe hō͘ lâng jiok ê soa-po͘? Koah tiū-á liáu-āu khòng thô͘-iô-á Phang kàu hō͘ i lâu chhùi-noā ê chhân-hoāⁿ? Só͘-í goá lâi chia, Moâ-tāu, Ou-miâ-toaⁿ éng-oán ê kò͘-hiong, Goá lê-thâu chò-kang ê só͘-chāi, Iū-á hoat kui-châng, tng-chhiⁿ ê joa̍h--lâng Goá tio̍h beh lı̄-khui. Kı̀ⁿ-nā lâi, tio̍h siūⁿ-tio̍h Tân Lûi, Sè-sè-hàn po̍h-pán ê thé-keh, 60 hoè, iáu ū chng-kha gín-á ê chhiò-iông, Pe̍h-sek khióng-pò͘ ê chheng-chhun, Ko͘-put-chiong lı̄-ki ê khó͘-thàng. Kı̀ⁿ-nā lâi tio̍h siūⁿ-tio̍h Tân Lûi ê siáu-soat, 30 nı̂ bô-piàn ê khiuⁿ-kháu, Oa̍h-lèng-lèng ka-hiong ê kò͘-sū. Kı̀ⁿ-nā that-chhia tio̍h hah-hı̀, Tio̍h ná chhiùⁿ “Éng-oán ê Kò͘-hiong”, Ná siūⁿ-tio̍h Tân Lûi kià--lâi ê e-mail: “Lí sı̍t-chāi ū hok-khı̀, Thang tı̄ Pak-sè-liâu hiah súi ê só͘-chāi kà-chheh. ” Siūⁿ-tio̍h i chaı̄m-chiām pe̍h--khı̀ ê thâu-chang, Tâi-oân-lâng soàⁿ-chiáu ê sin-sè, Tı̄ chiām-chiām àm--lo̍h-khi, tiān-hoé siám-sih, Lo̍h-lâm mı̂-mı̂ ê chhia-tı̄n--nih Goá ê kut sng-bâ, Nâ-âu jú lâi jú ta, Ba̍k-chiu-phoê kiông-beh sûi--lo̍h-khı̀. Chóng-sı̄, goá liàm ka-kı̄ ê kha-thúi, Kā kā-kı̄ kóng: “Bān-chhiáⁿ khùn! Tńg-khı̀ kò͘-hiong ê lō͘ Iáu chin tn̂g. ” (Tâi-bûn-thong-sı̀n Tē 115 kı̂, 2003 nı̂ 9 goe̍h) Lâi-goân: "https://zh-min-nan.wikisource.org/w/index.php?title=Goá_Lâi--ah_Moâ-tāu_hō͘_Tân_Lûi_hiaⁿ&oldid=6664" Lūi:

• Hiān-tāi Si
• 2003
• Tēⁿ Ngá-ı̂
• Goá Lâi--ah Moâ-tāu hō͘ Tân Lûi hiaⁿ

Chhiau-chhoē Chhoē Goá Lâi--ah Moâ-tāu hō͘ Tân Lûi hiaⁿ Ka-thiam gú-giân Ke chi̍t-ê toān-lo̍h